ខេត្តកំពង់ចាម ៖ ពេលរដូវចង្រិតចុះម្តងៗគេតែងឃើញប្រជាពលរដ្ឋរស់នៅតាមដងទន្លេ មេគង្គបំពាក់អំពូលម៉ែត្រពណ៌ស្វាយដាក់ចង មានទម្រដោយថង់កៅស៊ូធំៗព្រោងព្រាតត្រងចាប់យកចង្រិតសម្រាប់ធ្វើជាចំណើអាហារ ក្នុងគ្រួសារ និងខ្លះទៀតបាននាំយកមកលក់នៅតាមទីផ្សារនានា សូម្បីតែនៅតាមហាងធំៗក៏លក់ដាច់ណាស់ដែរ តែចង្រិតមានតាមរដូវកាលប៉ុណ្ណោះ ទើបប្រជាពលរដ្ឋខ្លះរិះពិធីសាស្ត្រធ្វើយ៉ាងណាឱ្យ មានចង្រិតលក់ជាប្រចាំ ។ ជាក់ស្តែងមានកសិដ្ឋានចិញ្ចឹមចង្រិតពូជធំនិងចង្រិតដូង ស្ថិតនៅភូមិបឹងកុក១ សង្កាត់បឹងកុក ក្រុងកំពង់ចាម កំពុងតែមមាញឹកក្នុងការភ្ញាស់ពងចង្រិតសម្រាប់បំពេញតម្រូវការ របស់ប្រជាពលរដ្ឋធ្វើឲ្យជីវភាពម្ចាស់កសិដ្ឋានកាន់តែប្រសើរឡើងថែមទៀត ។
លោកចេង សុធា អាយុ៤៣ឆ្នាំ ជាម្ចាស់កសិដ្ឋានចិញ្ចឹមចង្រិតពូជធំនិងចង្រិតដូងស្ថិត នៅភូមិ-សង្កាត់ខាងលើបានរៀបរាប់ប្រាប់កោះសន្តិភាពនារសៀលថ្ងៃទី៦ កុម្ភៈ ថា មានពេលមួយរូបលោកបានធ្វើដំណើរទៅលេងផ្ទះបងប្អូននៅប៉ោយប៉ែត ខេត្តបន្ទាយមានជ័យ ក៏បានជួបអ្នកចិញ្ចឹមចង្រិតម្នាក់។ ក្រោយពីស្តាប់គាត់រៀបរាប់ក៏មានចំណាប់អារម្មណ៍យ៉ាងខ្លាំង ព្រោះថាចិញ្ចឹមចង្រិតងាយស្រួលជាងចិញ្ចឹមជ្រូក មាន់ ទាទៅទៀត ដោយសារមិនមានសំឡេងធ្វើឱ្យរំខានដល់អ្នកជិតខាងនោះទេ ។ ម្ចាស់កសិដ្ឋានរូបនេះបានរៀបរាប់បន្តថា រហូតមកដល់ខែកញ្ញា ឆ្នាំ២០១១ រូបលោកបានធ្វើអាងបេតុងចំនួន៨ ដោយអាងនីមួយៗមានទំហំ២ម៉ែត្រគុណ៧ម៉ែត្រ និងកម្ពស់៨តឹក និងចាប់ផ្តើមភ្ញាស់ពងចង្រិតពូជធំដែលបានទិញមកពីប្រទេសថៃ ។ ក្នុងអាងមួយត្រូវដាក់ចានពងចង្រិតរហូតដល់ទៅ១៤០ចាន ហើយក្នុងរយៈពេល៤៥ថ្ងៃ យើងអាចចាប់លក់បានហើយ ដោយក្នុង១គីឡូក្រាមតម្លៃពី១៨.០០០ទៅ២០.០០០រៀល ។
លោកចេង សុធា ម្ចាស់កសិដ្ឋានចិញ្ចឹមចង្រិតបានបញ្ជាក់ថា ចំពោះចំណីអាហារសម្រាប់ផ្តល់ឲ្យចង្រិតស៊ីមានដូចជា ស្លឹកបាស់ស្មៅចិញ្ចៀន ស្មៅក្រវាញជ្រូក ។ កសិដ្ឋានចិញ្ចឹមចង្រិតរបស់លោកធំជាងគេនិងមានអតិថិជន កុំម្ម៉ង់ទិញពងចង្រិត និងចង្រិត មកពីគ្រប់ទិសទីទើបពេលខ្លះរកចង្រិតឱ្យម៉ូយមិនទាន់ព្រោះតម្រូវ ការនោះច្រើនពេក ។ ជាមួយគ្នានេះរូបលោកបានស្រាវជ្រាវរកឃើញវិធីសាស្ត្រថ្មី សន្លាងក្នុងការបង្កាត់ពូជចង្រិតដូងហើយលោកបានចិញ្ចឹមចំនួន៣អាង ដូច្នេះនៅក្រោយបុណ្យចូលឆ្នាំថ្មីប្រពៃណីជាតិខ្មែរយើងខាងមុខ រូបលោកនឹងចាប់ផ្តើមលក់ចង្រិតដូងនេះហើយ ដែលបានប្រើពេលចិញ្ចឹមដល់ទៅ៣ខែកន្លះ ។ ម្យ៉ាងទៀត ប្រសិនជាបងប្អូនណាចង់ចិញ្ចឹមចង្រិត សូមទំនាក់ទំនងកសិដ្ឋានរបស់លោកផ្ទាល់តែម្តង លោកនឹងលក់ជូនក្នុងតម្លៃថោកសមរម្យព្រមទាំងជួយបង្រៀនពីរបៀបចិញ្ចឹម ផងដែរ ៕