ថ្ងៃអង្គារ ទី២១ ខែកុម្ភៈ ឆ្នាំ២០១២ ម៉ោង ១៥:៣៩
កោះសន្តិភាព
រាជធានីភ្នំពេញ ៖ ក្រោមជំនួយឧបត្ថម្ភពីសហភាពអឺរ៉ុបប្រចាំកម្ពុជាកញ្ញាសាយ សុកាយ ដែលពីមុនគឺជាអ្នកដើរលក់នំតាមសាលារៀន និងរកចំណូលបានបន្តិចបន្តួចនោះ បានប្រែក្លាយជីវភាពរបស់ខ្លួនយ៉ាងឆាប់រហ័សតាមរយៈប្រកបមុខរបរ ចិញ្ចឹមសត្វក្រួចជាលក្ខណៈគ្រួសារ ។
កញ្ញាសាយ សុកាយ មានអាយុ២២ឆ្នាំ រស់នៅភូមិរំដួល ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ ហើយកំពុងប្រកបមុខរបរចិញ្ចឹមសត្វក្រួច ជាលក្ខណៈគ្រួសារ ខណៈពេលដែលផលិតផលរបស់នាងទទួលបានការគាំទ្រពីអតិថិជន ។
ជួបជាមួយកោះសន្តិភាពកញ្ញាសាយ សុកាយ រៀបរាប់ថា ដំបូងឡើយជីវភាពរបស់នាងមានការលំបាកខ្លាំងណាស់ ព្រោះមានលទ្ធភាពដើរលក់នំតាមសាលាបឋមសិក្សាប៉ុណ្ណោះ ។ ក្រោយមក មូលដ្ឋានរបស់នាងក្លាយជាគោលដៅមួយរបស់សហភាពអឺរ៉ុបក្នុងការអនុ វត្តគម្រោងកម្មវិធីជួយបណ្តុះបណ្តាលមុខជំនាញនិងផ្តល់លទ្ធភាព ជួយរកទីផ្សារឱ្យដល់ប្រជាពលរដ្ឋដែលប្រឈមនឹងបញ្ហាកង្វះខាត ជីវភាព ។ ចាប់ពីទទួលបានជំនួយពីសហភាពអឺរ៉ុបមក រូបនាងបានយកចិត្តទុកដាក់បណ្តុះបណ្តាលមុខជំនាញចិញ្ចឹមក្រួចរហូត ប្រែក្លាយមុខរបរពីអ្នកលក់នំតាមសាលាមកចិញ្ចឹមសត្វក្រួចជំនួសវិញ ។
កញ្ញាសាយ សុកាយ និយាយថា នាងមិនមានបំណងធ្វើចំណាកស្រុក ដើម្បីដើររកមុខរបរនៅខាងក្រៅទេ ព្រោះតាមព័ត៌មានដែលទទួលបានការចេញទៅធ្វើការងារខាងក្រៅ គឺជួបបញ្ហាប្រឈមខ្លាំងណាស់ ។ ម្យ៉ាងទៀតលុយដែលរកបាននោះ ក៏មិនច្រើនណាស់ណាដែរ។ ការគិតរបស់នាង គឺត្រឹមត្រូវដែលទីបំផុតនាងបានសម្រេចគោលបំណង និងមានលទ្ធភាព កែប្រែជីវភាព ហើយបើទោះជាមិនទាន់ធូរធារ ក៏ជីវភាពសព្វថ្ងៃនេះខុសគ្នាឆ្ងាយណាស់ បើប្រៀបធៀបជីវភាពកាលនាងដើរលក់នំតាមសាលារៀន ។
កញ្ញាសាយ សុកាយបានថ្លែងអំណរគុណចំពោះសហភាពអឺរ៉ុប ដែលបានជួយរូបនាង និងគ្រួសារនាង ហើយបើកុំតែមានគម្រោងកម្មវិធី ដែលឧបត្ថម្ភដោយសហភាពអឺរ៉ុបម្លេ៉ះសមរូបនាងមិនទាន់បានឃើញពន្លឺ នៃជីវភាពដូចសព្វថ្ងៃនេះទេ ។
ស្ថានភាពជីវភាពរបស់គ្រួសារកញ្ញាសាយ សុកាយ មិនទាន់ជាសម្បូរធូរធារទេ ប៉ុន្តែបើប្រៀបធៀបពេលមុន គឺខុសគ្នាឆ្ងាយណាស់ ក្នុងពេលដែលជីវភាពរកព្រឹកខ្វះល្ងាច រហូតបង្ខំឱ្យកញ្ញាបោះបង់ចោលការសិក្សាត្រឹមថ្នាក់ទី៧ និងធ្វើនំលក់តាមសាលាទទួលបានកម្រៃតិចតួច ។
គេហដ្ឋានរបស់គ្រួសារកញ្ញាសាយ សុកាយ មិនទាន់មានសម្ភារ ឬគ្រឿងសម្អាងអ្វីគួរឱ្យកត់សម្គាល់ក៏ពិតមែន ប៉ុន្តែអ្វីៗដែលកំពុងមាននៅក្នុងផ្ទះ ដូចជាសត្វក្រួច ពងក្រួច សត្វជ្រូក មាន់ និងបន្លែបង្ការ ជុំវិញផ្ទះ គឺបង្ហាញថា ជាសម្ភារដ៏មានតម្លៃសម្រាប់ជីវិតគ្រួសាររបស់នាង ។
នារីវ័យក្មេងនេះបញ្ជាក់ថា ក្នុងមួយឆ្នាំ ចំណូលក្នុងមុខរបររបស់គ្រួសារនាងគឺទទួលបានពី១៥០០ ទៅ១៨០០ដុល្លារ ហើយចំនួននេះគឺច្រើនណាស់ សម្រាប់ប្រជាពលរដ្ឋកម្ពុជា ដែលកំពុងរស់នៅតាមជនបទ ។
លោក Jean François CAUTAIN ឯកអគ្គរដ្ឋទូតសហភាពអឺរ៉ុបប្រចាំកម្ពុជាដែលបានទៅដល់មូលដ្ឋាន ភូមិរំដួល និងទៅដល់គេហដ្ឋានកញ្ញាសាយ សុកាយ បានបង្ហាញក្តីសប្បាយរីករាយ និងមោទនភាពយ៉ាងខ្លាំងចំពោះគម្រោងកម្មវិធីដែលឧបត្ថម្ភដោយសហភាព អឺរ៉ុប និងទទួលបានជោគជ័យគួរឱ្យកត់សម្គាល់ ។ លោកបញ្ជាក់ថា ភស្តុតាងទាំងនេះបានបង្ហាញថា EU មិនអាចនឹងបញ្ឈប់ជំនួយមកឱ្យប្រជាជនកម្ពុជាទេ ប៉ុន្តែត្រូវបង្កើនជំនួយបន្ត និងបន្ថែមទៀត ដើម្បីកែប្រែជីវភាពប្រជាពលរដ្ឋកម្ពុជា រួមចំណែកដល់ការកាត់បន្ថយភាពក្រីក្រនៅកម្ពុជាផងដែរ ៕